ពូជស្វាយចន្ទីមួយ​ប្រភេទ កសិករនិយម​ទិញ​យកទៅ​ដាំដុះ តម្លៃកូនលក់​ចេញ​​ចាប់ពី ១៥០០ រៀលក្នុង ១ដើម

ស្វាយចន្ទីជា​ដំណាំសក្តានុពលមួយ ក្នុងប្រភេទ​ដំណាំផ្សេង​ទៀត​​។ កសិករ​នៅ​ខេត្ត​​ក្រចេះ ស្ទឹងត្រែង កំពង់ធំ ចាប់ផ្តើម​​ភ្ជួរ​ដី​ដាំ​ស្វាយ​ចន្ទីនៅពេល​ធ្លាក់ភ្លៀង​ ​ចាប់ពីខែ​ឧសភា មិថុនា ដែល​ជា​ខែ​អំណោយផល​សម្រាប់ដាំដុះ​ដំណាំមួយ​នេះ។

​អ្នកលក់ពូជស្វាយចន្ទីមួយ​រូប​នៅ​ស្រុកស្ទឹងត្រង់ខេត្តកំពង់ចាម​បាន​ឲ្យកម្ពុជា​ថ្មី​ដឹង​ថា ពូជស្វាយចន្ទីដែល​មានការ​ពេញនិយមជាងគេ​បច្ចុប្បន្ន​គឺ​ប្រភេទ​ពូជ​ M23។

អ្នក​លក់ពូជស្វាយចន្ទី​​ឈ្មោះ​ ថេត រស់នៅ​ស្រុកស្ទឹងត្រង់​ខេត្ត​កំពង់​ចាម​​​ឲ្យ​ដឹង​ថា កូនស្វាយចន្ទីដែលគាត់លក់​ដាច់ច្រើន​ជាង​គេគឺ​ពូជ​ M23។​​​ ពូជនេះ​មានការ​ពេញ​និយម​កសិករទិញយកទៅដាំដុះ​ច្រើន​ ដោយសារ​មាន​​ទំហំ​គ្រាប់ធំ មាន​រសជាតិ​ឆ្ងាញ់ ​ផ្តល់ទិន្នផលខ្ពស់​ជា​មធ្យម​ក្នុង​មួយ​ហិកតា​អាច​ផ្ដល់​ទិន្នផល​បាន​ជិត ២ តោន។

ពូជស្វាយចន្ទី M23 ដែល​លោក​លក់​ចេញ​តម្លៃ​ចាប់​ពី ១៥០០ រៀលទៅ ១៨០០ រៀល រួមទាំង​សេវា​ដឹក​ដល់កន្លែង​។​ ​លោក​អះអាង​ថា ប្រភេទ​​ពូជ M23 ក៏​មានការ​ណែនាំនិង​ទទួល​ស្គាល់​ពីក្រសួងកសិកម្ម រុក្ខាប្រមាញ់ និងនេសាទ​ផង​ដែរ។

លោក អួន ស៊ីឡុត ប្រធាន​សមាគម​ស្វាយចន្ទី​កម្ពុជាឱ្យ​ដឹង​ថា នៅ​កម្ពុជាមាន​ពូជស្វាយ​ចន្ទី​ចំនួន ៧​ ប្រភេទ ដែល​កសិករ​​និយម​​ដាំដុះច្រើន​ រួមមាន M1 ឬ SM1, M23, IM4, M10, H09, M7 និង SAN1។ ​ក្នុង​ចំណោម​ពូជ​ទាំង ៧ ​នេះ ពូជ M23 គ្របដណ្តប់​ជាង ៦០​ ភាគរយ ក្នុង​ចំណោម​ផ្ទៃដី​ដាំដុះ​សរុប​ទូទាំង​ប្រទេស។

ពូជ M23 ខុសពីពូជស្វាយផ្សេងគឺមានគ្រាប់ធំ ​ផ្លែច្រើនឆាប់​ទទួល​ផលហើយមានទីផ្សារ​។ យ៉ាងណាមិញបើ​តាម​ ប្រធាន​សមាគម​ស្វាយចន្ទី​កម្ពុជា ក្រៅពីពូជក្នុងស្រុក M23 ដែលកសិករពេញនិយម​ដាំ ក៏​មានការ​នាំ​ចូល​ពូជ​​ផ្សេង​ទៀត​ដូចជា ពូជ PN1, MH4, MH5។

ស្វាយចន្ទីគឺជា​កសិផល​ដែល​បាន​ផ្តល់​តម្លៃ​បន្ថែម​ខ្ពស់ ខណៈ​រដ្ឋាភិបាលក៏កំពុង​ជំរុញ​ផលិតភាពលើការ​ដាំ​ដំណាំ​មួយ​នេះ​ ដើម្បីកែច្នៃ​ជំរុញការ​នាំ​ចេញ​។ 

កសិករម្នាក់ឈ្មោះ​ គឹម ​ស្រ៊ន រស់នៅភូមប្រលូង ឃុំសោប ស្រុកព្រែកប្រសប់ ខេត្តក្រចេះ ​ដែល​បាន​ជ្រើសរើស​ពូជ M23​ ដាំដុះ​ប្រាប់​ថា ​ពូជប្រភេទ​នេះ​មាន​តម្លៃ​រាង​ថ្លៃ​បន្តិច ប៉ុន្តែ​ដំណាំលូតលាស់បានល្អ និង​ទីផ្សារមានតម្រូវការ​ខ្ពស់។

​លោក ថេត ម្ចាស់​លក់កូនពូជស្វាយចន្ទីនៅស្រុកស្ទឹងត្រង់ ដែល​ក្រៅពី​លក់កូនពូជស្វាយចន្ទី​ក៏​មាន​សេវា​ដាំដុះ​ដល់​កសិករ​ផង​ដែរ។ លោក​បាន​បង្ហើបពី​​​បច្ចេកទេស​ដាំ​ស្វាយ​ចន្ទី​ឲ្យ​លូត​លាស់​​ល្អ​ និងបាន​ទិន្នផល​ខ្ពស់ ​ដំបូង​​គឺ​ការ​​ជ្រើស​រើស​ពូជ។ បន្ទាប់​មក​ត្រូវភ្ជួរដី​​ឲ្យ​ល្អ រួច​​ត្រូវជីករណ្តៅជំរៅ 4 តឹក​មុនដាំ ហើយ​ត្រូវដាក់ជីក្នុងរណ្តៅ​រួចទើបដាក់​កូន​ស្វាយ​ចន្ទី។ បន្ទាប់ពីដាំរួចត្រូវពូនគល់​​ឲ្យ​​បាន​ខ្ពស់ល្អ។

លោកបន្ត​ថា ស្វាយ​ចន្ទី​ត្រូវការ​ដី​ល្បាយខ្សាច់ដែលមិនជាំទឹក ព្រោះដីនេះជាដីប្រភេទអន់តែវាជាប្រភេទដីល្អសម្រាប់ដាំស្វាយចន្ទី។

លោកក៏ណែនាំ​បន្ថែម​ដល់​កសិករដែលដាំស្វាយចន្ទី គួរតែស្វែងយល់ឱ្យច្បាស់ពីបច្ចេកទេសដាំ ការ​ជ្រើសរើសពូជឲ្យ​ល្អ ដើម្បី​ទទួល​បាន​ទិន្នផល​កុំ​ឲ្យ​ខាតពេល​បង់​ថវិកា​អត់ប្រយោជន៍៕